ਨਿੱਤਨੇਮ-

ਵਿੱਚ ਡਾਹ ਲਿਆ ਡਿਉੜੀ ਦੇ
ਲੈਂਦਾ ਹੁਸਨ ਇਸ਼ਕ ਦੀਆਂ ਪਰਖ਼ਾਂ
ਨੀ ਤੇਰਾ ਚਿੱਤ ਨਾ ਕੱਤਣ ਦਾ
ਬਿਨਾ ਪੂਣੀਓਂ ਘੁਮਾਈਂ ਜਾਵੇਂ ਚਰਖਾ
ਇੱਕ ਚੋਬਰਾਂ ਦੀ ਜਿੰਦ ਟੁੱਟਦੀ
ਦੂਜੀ ਤੰਦ ਟੁੱਟੇ ਬਿੰਦ ਬਿੰਦ ਨੀ
ਪਹਿਲੀ ਤੇਰੀ ਟੇਢੀ ਤੱਕਣੀ
ਦੂਜਾ ਚਰਖ਼ੇ ਦੇ ਤੱਕਲੇ ਚ ਵਿੰਗ ਨੀ
ਪਾਈ ਜਾਣ ਡੰਡ ਇੱਕ ਘੁੰਗਰੂ ਅਵੈੜੇ
ਦੂਜਾ ਚਰਖਾ ਵੀ ਨਾਲ ਮਾਰੀ ਜਾਵੇ ਕੂਕ ਨੀ
ਝਾਂਜਰਾਂ ਨੂੰ ਕਸ ਗਿੱਟੇ ਮੇਚ ਕਰਾਲੈ
ਨੂੜ ਚਰਖੇ ਦੀ ਮਾਹਲ ਲਾ ਕੇ ਗਿੱਲੀ ਗੂੰਦ ਨੀ
ਮਧਾਣੀਆਂ ਦੇਆਂ ਗੇੜੇਆਂ ਮਗਜ਼ ਘੁੰਮਦਾ
ਕਿਹੜੇ ਚੱਕਰਾਂ ਚ ਪੈ ਗਈ ਮੈਂ ਕੱਚੀ ਉਮਰੇ
ਯਾਰ ਲੰਘਿਆ ਗਲੀ ਚੋਂ ਮੈਨੂੰ ਜੋਸ਼ ਆ ਗਿਆ
ਲੱਸੀ ਉੱਛਲ ਕੇ ਬਾਹਰ ਦੱਸ ਚਾਟੀ ਕੀ ਕਰੇ
ਲੜ ਇਸ਼ਕੇ ਦੇ ਲੱਗੀ ਜਦੋਂ ਹੋਸ਼ ਸੰਭਲੀ
ਦਾਜ਼ ਵਰੀਆਂ ਵਿਚੋਲੇ ਫਾਹਾ ਵੱਢ ਹੋ ਗਿਆ
ਨੀ ਤੇਰੇ ਸਿਰ ਫੁਲਕਾਰੀ ਤੂੰ ਬਾਗ ਕੱਢੀ ਜਾਵੇਂ
ਖੱਬੇ ਖੂੰਜੇ ਸਿਰਨਾਂਵਾਂ ਯਾਰ ਕੱਢ ਹੋ ਗਿਆ.